Një aksion i përbashkët mes Policisë së Kosovës dhe njësive të Doganës ka rezultuar me sekuestrimin e një sasie armësh në fshatin Banullë të komunës së Lipjanit.

Gjatë kontrollit në një auto-sallon, pronë e dy të dyshuarve kosovarë, janë gjetur dhe sekuestruar gjashtë pistoleta, gjashtë karikatorë dhe njëzet fishekë. Si prova materiale janë sekuestruar gjithashtu dy telefona celularë dhe një pajisje DVR e kamerave të sigurisë.

Dy personat e dyshuar janë arrestuar në vendngjarje. Pas intervistimit në prani të prokurorit të çështjes, njëri prej tyre është dërguar në mbajtje, ndërsa tjetri është liruar në procedurë të rregullt.

Rasti është iniciuar si “Import, eksport, furnizim, transportim, prodhim, këmbim, ndërmjetësim ose shitje e paautorizuar e armëve” dhe po trajtohet nga organet kompetente.

“Gjatë kontrollit bashkë me njësitë e doganës, në një auto-sallon pronë e dy të dyshuarve meshkuj kosovarë, janë gjetur dhe sekuestruar: gjashtë pistoleta, 6 karikatorë dhe 20 fishekë. Po ashtu në cilësi të provave materiale janë sekuestruar edhe dy telefona celularë dhe një DVR i kamerave. Dy të dyshuarit janë arrestuar dhe pas intervistimit me vendim të prokurorit njëri është dërguar në mbajtje, e tjetri është liruar në procedurë të rregullt”, thuhet në raportin 24-orësh të Policisë.